Podcast - O universo

O alumnado de Educación Infantil quíxonos mostrar todo o que saben sobre o Universo, dando a coñecer o seu proxecto a través da radio escolar. Neste programa especial fálannos dos planetas que forman o Sistema Solar, das estrelas e as constelacións, das fases da Lúa...

Está atento e non te perdas detalle!

Se desexas escoitar o podcast só debes de facer  clic sobre a imaxe.

Se o alumnado de infantil espertouche a curiosidade por saber máis sobre os segredos do Universo, estes son algúns dos libros que leron na clase.

Traballando a poesía

O alumnado de 5º de Educación Primaria celebrou o Día Mundial da Poesía, 21 de marzo, compoñendo estrofas dedicadas ao Carballo do banquete de Conxo.

Coa conmemoración do Día Mundial da Poesía preténdese impulsar a diversidade lingüística a partir da expresión  poética, promover o ensino e a aprendizaxe da poesía, así como fomentar a tradición oral dos recitais poéticos...

Por outra banda, tentouse darlle visibilidade a esta árbore centenaria do bosque do banquete de Conxo, con máis de 250 anos de vida.

Esperamos que vos gusten estas rimas.

Campaña - Ti si que es un bo peixe.

O martes 22 de marzo puidemos gozar do programa creado pola Consellería do Mar: "Ti si que es un  bo  peixe".

Este programa ten como obxectivo facilitar o coñecemento do consumo de produtos frescos do mar entre a poboación infantil e xuvenil.

Todo o alumnado recibiu como detalle un receitario e un póster, que tamén se pode descargar desde a súa páxina web.

-  https:// tisiqueesunbopeixe. xunta. gal/ index.html

Aquí deixámosvos unha mostra fotográfica da presentación do programa: "Ti si que es un un  bo  peixe", realizado na biblioteca escolar.

Infantil na Radio Fuco

O alumnado de Educación Infantil disfrutou da radio, realizando un programa especial sobre Rosalía de Castro. 

Para acceder ao podcast fai clic na imaxe.

SEMANA DA PRENSA

 

Durante a semana da prensa, celebrada do 7 ao 11 de marzo, o alumnado de primaria traballou con diversos xornais e revistas seleccionando artigos vinculados coa muller ou con protagonistas femininas.

Traballouse a prensa como medio de comunicación social, como instrumento de aprendizaxe e de acceso á información. Analizamos as noticias e seleccionamos artigos das diversas seccións. Tamén puidemos comprobar como algunhas  das seccións teñen máis volume de artigos centrados en  mulleres. Algúns exemplos son: a sección de deportes ou a sección de sociedade.

Doutra banda, o alumnado de infantil fixo o cartel presentación da exposición da semana da prensa, utilizando unha técnica  tipo colaxe.

Aquí tedes unha mostra dos nosos paneis e murais expositivos, comezando polo cartel presentación do grupo de Educación Infantil.

 

A MULLER COMO REFERENTE.

Para celebrar o 8 de marzo, o día internacional da Muller, no centro decidimos fixar a nosa atención naquelas mulleres que foron, son e serán referentes na vida de cada un dos nosos alumnos/-as.

O alumnado de educación infantil retratou á súa figura feminina de referencia, con moita orixinalidade e cor. 

Os  alumanos/-as de 1º e 2º de educación primaria debuxaron mulleres de referencia nun escenario laboral e acompañaron os debuxos cunha oración.

O resto do alumnado de Educación Primaria elaboraron un texto. Nel presentaban, describían e explicaban por que a persoa elixida era importante na súa vida e supoñía un referente para eles e elas. Cada texto foi acompañado co debuxo ou a fotografía da persoa en cuestión: bisavoa, avoa, nai, madriña, tía, irmá...

Todos os traballos foron expostos na entrada do centro para poder ser compartidos coas familias.

O alumnado de terceiro e cuarto elaborou ramos con papel crespón e  limpapipas para regalar ás mulleres especiais nas súas vidas.

Desde a área de relixión elaboráronse marcapáxinas, acompañados dun pequeno texto facendo referencia á importancia da muller e á igualdade de xénero.

Entroido 2022

 XOVES   24/02/2022

VENRES   25/02/2022

"Emigrando con Fuco"

O GRAN CAMIÑO.

2 Etapa. Camiño da Coruña. Costa da Morte. Bertamiráns - Ézaro. Paso por Santa Comba.

ACTUACIÓN:

  - Tanxugueiras - TERRA

  - Artistas: Alumnado de Educación Infantil

Dedicado a Rosalía...

Despedímonos do mes de febreiro  mostrandovos como quedou o noso grafiti dedicado a Rosalía de Castro. Como vos adiantabamos na entrada anterior do blogue, unha das actividades programadas para a celebración do 23 de febreiro era retratar a Rosalía, xunto con algunha das súas marabillosas estrofas. As estrofas seleccionadas atópanse vinculadas co noso proxecto anual "Emigrando con Fuco". Nestas reflíctese unha realidade pasada e presente e o sentimento que acompaña deixar a terra natal en busca de oportunidades.