OBRADOIRO: POSTAIS DE NADAL CON LUCES

 

Durante estes días previos ao Nadal realizouse un obradoiro moi especial de creación de postais de Nadal con luces. A actividade resultou todo un éxito e encheu o espazo de creatividade, ilusión e moita curiosidade.

Para a realización deste obradoiro contamos coa presenza de Almudena, que guiou ao alumnado paso a paso na elaboración das postais luminosas. Grazas ás súas explicacións e á súa axuda, os nenos e nenas puideron coñecer dun xeito sinxelo e práctico como integrar pequenas luces nas súas creacións, combinando a expresión artística cun primeiro achegamento á tecnoloxía.

Cada participante elaborou unha postal única, chea de cor e espírito nadalicio, que poderá ser empregada para felicitar estas festas dun xeito orixinal e feito a man. A actividade favoreceu o traballo manual, a creatividade e a aprendizaxe a través da experimentación.

Desde o centro queremos agradecer a Almudena a súa colaboración e a todo o alumnado a súa participación e entusiasmo. Sen dúbida, foi unha experiencia moi enriquecedora que deixou unha fermosa lembranza destas datas tan especiais.

TALLER MONOGRÁFICO: CREA O TEU MARCAPÁXINAS DE NADAL

 O pasado xoves, durante o tempo de recreo, a biblioteca do centro converteuse nun espazo creativo e cheo de ilusión grazas ao taller de elaboración de marcapáxinas de Nadal. 

Ao longo do taller, os nenos e nenas puideron realizar e decorar os seus propios marcapáxinas dunha árbores de Nadal empregando diferentes materiais: papeis de cores, rotuladores, adhesivos e motivos típicos destas datas tan especiais. Cada creación foi única, reflectindo a creatividade e a personalidade de quen a elaborou.

Esta iniciativa,  permitiu compartir un tempo lúdico e tranquilo no recreo, promovendo o uso da biblioteca como un lugar de encontro, aprendizaxe e diversión. Os marcapáxinas realizados poderán acompañar as lecturas de Nadal ou converterse nun bonito agasallo feito a man.

Desde a biblioteca queremos agradecer a participación do alumnado e animarvos a seguir formando parte das actividades que se irán desenvolvendo ao longo do curso. Agardámosvos na biblio!

Xornadas de contos de Nadal

 

Esta semana na biblioteca do centro demos inicio a unhas xornadas moi especiais: as familias do alumnado de Educación Infantil comezaron a vir contarnos contos de Nadal. Un espazo de encontro, de emoción e de descubrimentos que encheu a biblio de voces, sorrisos e ilusión.

O primeiro conto escollido para inaugurar esta actividade foi Óscar cómese o Nadal, unha historia divertida e entrañable que fixo as delicias dos máis pequenos. Grazas á participación da primeira familia, o relato cobrou vida entre risas, sorpresa e moita maxia festiva.

Dende a biblioteca así como dende o equipo de educación infantil, queremos agradecer a colaboración das familias, pola súa dispoñibilidade, entusiasmo e por compartir connosco un anaco do seu tempo para fomentar o gusto pola lectura. Estes momentos son os que fan comunidade e axudan a crear recordos para sempre.

Seguiremos gozando de máis contos e máis visitas nos próximos días…

A biblio xa arrecende a Nadal!

Saída cultura ao Cee: cinema para aprender e desfrutar

 

Onte o alumnado do noso centro participou nunha saída a Cee. O obxectivo da mesma foi achegar o cine como ferramenta de aprendizaxe, reflexión e diversión.

A xornada comezou cunha visita ao cinema local, onde puidemos gozar de dúas estreas moi esperadas:

-  Zootrópolis 2
Unha aventura chea de humor, ritmo e valores como a convivencia, a diversidade e o traballo en equipo. 

- Wicked 2
Un espectáculo visual e musical no que nos mergullamos nun mundo fantástico, que invita a pensar sobre a amizade, as decisións persoais e o que significa ser diferente.

A actividade foi todo un éxito, cun ambiente de entusiasmo e moita curiosidade. Seguiremos promovendo propostas que fomenten o gusto pola lectura, pola cultura e polas artes.

CAMPAÑA SOLIDARIA DE ALIMENTOS

A biblioteca do noso centro súmase á iniciativa solidaria de recollida de alimentos, colaborando cos Servizos Sociais do Concello para axudar ás familias que máis o necesitan.

Durante estas semanas, convidámoste a participar achegando alimentos non perecedoiros (pasta, arroz, legumes, leite, aceite, conservas…). Cada pequeno xesto suma, e entre todas e todos podemos facer unha gran diferenza.

Por cada doazón que traias
, agardarate un libro de agasallo. Un libro para ti, porque compartir tamén é unha maneira de medrar.

A campaña estará activa ata o 18 de decembro.

Moitas grazas pola vosa colaboración!

25 de novembro: Unha xornada contra a violencia de xénero na nosa biblioteca

 

O pasado 25 de novembro, o noso centro sumouse un ano máis á conmemoración do Día Internacional da Eliminación da Violencia contra as Mulleres, unha data clave para reflexionar, educar e avanzar cara a unha sociedade máis xusta e igualitaria.

A xornada estivo marcada por dúas actividades moi significativas. En primeiro lugar, tivemos o pracer de acoller na biblioteca a representación teatral “A pita xefa”, unha obra que mestura humor e reflexión para visibilizar situacións cotiás de desigualdade. A actividade foi organizada polo Concello de Santa Comba, ao que agradecemos a súa colaboración e compromiso coa educación en igualdade.

Paralelamente, todo o alumnado do centro participou na creación do Muro do Bo Trato, un espazo colectivo onde cada neno e nena colocou o seu “ladrillo”: unha palabra ou mensaxe que representa os valores do respecto, da empatía e da convivencia positiva. O resultado foi unha obra simbólica e chea de cor, que permanecerá exposta como recordo do compromiso de toda a comunidade educativa.

 

Para continuar fomentando a reflexión desde a lectura, deixamos tamén unha pequena selección que temos na estantería temática de recomendacións lectoras sobre igualdade e bo trato.

 

 

Educar en igualdade é construír un futuro mellor. 

Samaín!

 O pasado xoves celebramos o Samaín con moita ilusión e creatividade! Foi unha xornada moi especial na que o noso centro se encheu de cores, risas… e tamén dun pouquiño de medo.

Durante a mañá, o alumnado participou en obradoiros internivel, onde cada grupo puido experimentar e aprender de forma divertida. Houbo manualidades terroríficas, receitas arrepiantes, danza embruxada e un espazo de maquillaxe de medo no que apareceron pantasmas, bruxas e monstros de todos os estilos.

Ao rematar os obradoiros, celebramos a entrega de premios dos concursos de cabazas decoradas e de relatos e debuxos de medo. A creatividade e o talento do noso alumnado fixeron moi difícil a elección das gañadoras e gañadores.

Todos estes traballos poden verse agora na biblioteca escolar, onde prepararmos un mural especial titulado “Sementando o medo”. Alí quedan expostos os nosos contos e debuxos para que toda a comunidade educativa poida gozar coas creacións deste Samaín.

Unha vez máis, o Samaín demostrou ser unha ocasión perfecta para compartir, aprender e divertirnos arredor das tradicións e da imaxinación.

Grazas a todas e todos pola vosa participación e entusiasmo!

Día das Bibliotecas 2025: Inauguración da nosa Biblioteca Escolar e Magosto!

 Este curso 2025-2026 arrancamos coa posta en marcha do noso novo proxecto anual: PepeXANTA, unha iniciativa que combina a alimentación saudable, a cultura gastronómica e o pracer de aprender compartindo experiencias arredor da cociña e dos alimentos. Ao longo do ano, o alumnado descubrirá receitas, costumes e tradicións que nos axudan a coñecer mellor a nosa cultura e a coidar de nós mesmos a través dunha dieta equilibrada.

E que mellor maneira de comezar este proxecto ca coincidindo coa celebración do Día das Bibliotecas, o pasado 24 de outubro. Un día dobremente especial, pois tamén inauguramos oficialmente a nosa Biblioteca Escolar neste novo curso.

Para festexar a ocasión, organizamos un Magosto moi saboroso e divertido, no que toda a comunidade educativa —alumnado, profesorado, familias e persoal non docente— participou con moita ilusión.

Esta actividade partiu do primeiro reto proposto pola biblioteca, a realización de dúas receitas de outono, na que ademáis da cociña, previamente se traballaron contidos das áreas de lengua, lingua, matemáticas ou inglés. 

O momento estrela da xornada foi un showcooking de arroces de outono, dirixido polo noso director e enmarcado dentro do proxecto PepeXANTA. Contou coa colaboración do alumnado de 3º, 4º, 5º e 6º de Educación Primaria, que se puxo o mandil para preparar uns arroces deliciosos con ingredientes típicos da estación, como a cabaza, castañas, figos, zorza ou cogumelos variados.

Por suposto, tamén asamos castañas, que puidemos degustar todos e todas mentres o arrecendo a outono enchía o patio da escola.

A festa rematou coa actuación de Alberto Show, do grupo Alborada, que puxo música, humor e moito ritmo a unha mañá inesquecible.

Foi unha celebración chea de sabor, aprendizaxe e convivencia, na que lembramos que as bibliotecas son espazos vivos, onde se cociñan ideas, proxectos e soños compartidos.

Pasámolo pipa!

 

 

FESTA FIN DE PROXECTO: ÑAM, ÑAM!

Este pasado mércores puxémonos mans á obra para pechar o proxecto Ñam! cun enorme reto para todo o centro. Cada aula tiña unha labor, uns cociñar receitas e outros poñer a mesa. Traballamos todos xuntos e cun mesmo obxectivo, conseguir sacar todas as receitas e poder desfrutar da festa final. 

As receitas quedaron espectaculares, propias duns Chefs con estrela Michelín e non deixaron nin as migallas. Tiñamos batidos de froitas, cocas, bocadiños de polo, brochetas de froita, guacamole con pauciños de pan e empanadillas.

Temos que agradecer a axuda das nosas Super cociñeiras Lupe e Carmen que botaron unha man para que todo estivese perfecto.

RETO PARA INFANTIL: BOCADILLO DE POLO

Os nenos e nenas do 2º ciclo de Educación Primaria deseñaron unha receita que lle tocou elaborar aos máis pequenos do centro para a festa de fin do proxecto Ñam! Tocounos o bocadillo de Polo. Unha receita sinxela pero con algo de complexidade á hora de montala.

Antes de poñernos a realizala, repasamos os ingredentes expostos na receita e o seu modo de elaboración. Logo fixemos equipos e puxémonos a preparar os alimentos para poder engadilos ao bocadillo.

RETO PARA INFANTIL: DECORAR AS MESAS

O Mago Fuco pediunos que para a festa de Fin de proxecto Ñam! nos fixésemos cargo das mesas e a decoración. Polo que comezamos a investigar como se poñen as mesas e que toque especial lle podemos dar para a festa final. Ao remate decidimos decorar os manteis cos alimentos que estivemos vendo e utilizando nas nosas receitas durante o curso. A maiores decidimos darlle un toque festivo poñéndolle confeti de moitas cores.

3ª FASE: PODCAST COA HISTORIA DAS NOSAS PERSONAXES

Despois de preparar a escenografía para as personaxes, toca contar a súa historia. Para iso, os nenos e nenas do 1º ciclo de Educación Primaria fixeron un podcast contando o que lle acontece a cada unha das personaxes creadas.

2ª FASE: DESEÑO DUNHA ESCENOGRAFÍA - BIBLIOTECAS CREATIVAS

O alumnado de 1º e 2º de Educación Primaria está levando a cabo o deseño da escenografía para as personaxes que crearon a partir do conto "É tempo de Entroido". Para iso contaron co estupendo asesoramento de Patricia Gestoso, que a maiores de axudarnos a montar o taller creativo, tamén asesorou aos nosos nenos e nenas de como deseñar unha axeitada escenografía. 

TALLER DE BIBLIOTECAS CREATIVAS

Esta semana tivemos a honra de que contar coa experiencia e profesionalidade de Patricia Gestoso Abraín,

que nos montou un taller con propostas sobre a alimentación. O principal obxecto era dinamizar o noso PDI dentro do programa de Bibliotecas Creativas. 

Grazas a iso, hoxe os nosos pequenos e pequenas puideron desfrutar deste taller, desenvolvendo a súa creatividade e estimulando a súa capacidade sensorial.

Grazas Patricia polo teu magnífico traballo e adicación!

AS LETRAS GALEGAS 2025

 Neste 2025 o día das Letras Galegas estivo adicado as pandeireteiras e cantareiras galegas que nos acompañaron e acompañan nas foliadas, seráns e festas da nosa terra.

Desde o colexio quixemos facer unha pequena homenaxe a tódalas cantareiras galegas pero tamén ás de Santa Comba, en especial a María Mourelle que nos acompañou neste día tan sinalado. Foi unha grande honra contar con ela e poder escoitar a súa música e cantiga popular, sen esquecernos das nosas pequenas pandeireteiras que nos deleitaron cunhas fermosas pandeiretadas.

Feliz día das Letras Galegas 2025!

1ª FASE : DÁNDOLLE VIDA ÁS NOSAS PERSONAXES - BIBLIOTECAS CREATIVAS

Os nenos e nenas do 1º ciclo de Educación Primaria estamos metidos de cheo nun proxecto moi interesante, que partiu do traballo das personaxes de entroido e dunha secuencia de texto poético do libro “É tempo de entroido”. Co tempo a creación das nosas personaxes foi evolucionando, traballamos os adxectivos, creamos a súa personalidade inventando a historia da súa vida e unha vez adquirida a rutina de prensamento, elaboramos a secuencia do texto descriptivo. Logo gravamos no Scratch e conectamos as personaxes ao Makey Makey.

O noso seguinte paso vai ser elaborar a escenografía, para iso necesitaremos a colaboración dunha grande especialista nesta área Patricia Gestoso que nos virá asesorar sobre como realizar esta tarefa.