LETRAS GALEGAS

 No noso centro celebramos con grande ilusión o Día das Letras Galegas cunha xornada moi especial adicada á figura de Begoña Caamaño, na que participou toda a comunidade educativa.

Comezamos cun fermoso contacontos arredor da vida e da obra da autora, aberto a todo o alumnado, ás familias e á comunidade educativa, grazas á colaboración do Concello de Santa Comba e da Deputación da Coruña, aos que queremos agradecer o seu apoio e implicación.

Ademais, tivemos a sorte de contar coa visita do alumnado do IES Terra de Xallas, que acudiu ao noso centro para compartir con nós outro contacontos cheo de ilusión e entusiasmo. Moitas grazas tamén ás profesoras do IES pola súa implicación, colaboración e por facer posible este encontro tan especial entre centros.

Ao longo destes días realizamos tamén unha liña do tempo sobre Begoña Caamaño, na que cada aula traballou e explicou diferentes etapas da súa vida, permitindo coñecer mellor a súa traxectoria persoal e literaria dun xeito colaborativo e moi enriquecedor.

A celebración contou ademais coa participación das pandereteiras do noso cole, que nos agasallaron con varias pezas musicais cheas de tradición e sentimento. Para rematar, toda a comunidade cantou o Himno de Galicia, poñendo o broche final a unha xornada inesquecible de convivencia, cultura e orgullo pola nosa lingua.

Durante o acto fíxose tamén entrega do premio e diploma a Martina, gañadora do concurso de logo do centro. Parabéns polo seu gran traballo e creatividade!

Grazas a todas as persoas que participaron, ao equipo de EDLG e a todas as que fixeron posible unha celebración tan especial das nosas Letras Galegas.

CAMPO A TRAVÉS PORTO DO SON

Onte, parte do alumnado do noso centro participou nunha xornada deportiva de campo a través celebrada en Porto do Son, dentro do programa XOGADE.

Ao longo da mañá, os rapaces e rapazas tiveron a oportunidade de compartir unha experiencia deportiva moi enriquecedora xunto con alumnado doutros centros educativos, nun ambiente de compañeirismo, esforzo e convivencia. As distintas probas desenvolvéronse nun gran ambiente, no que o máis importante foi a participación, a superación persoal e o desfrute da actividade física ao aire libre.

Desde o centro queremos felicitar ao noso alumnado, así como agradecer o traballo do profesorado acompañante e da organización do evento.

Parabéns a todos e todas pola vosa participación!

OS MAIOS

 A semana pasada, no noso CEIP, vivimos unha xornada moi especial arredor dunha das tradicións máis fermosas da nosa cultura: os Maios. A actividade realizouse en agrupamentos internivel, unha experiencia enriquecedora na que alumnado de diferentes cursos compartiu tempo, aprendizaxes e moita creatividade.

Durante a mañá, os distintos grupos colaboraron na elaboración dos seus maios empregando materiais naturais como flores, fiúnchos, follas, musgo e pólas. Entre todas e todos fomos dando forma ás creacións, aprendendo a importancia do traballo en equipo, da cooperación e do respecto polas tradicións populares galegas.

Ademais da parte artística, tamén tivemos ocasión de coñecer un pouco máis sobre a orixe desta celebración, ligada á chegada da primavera e ao renacer da natureza. O alumnado participou con entusiasmo nas distintas propostas, compartindo ideas, axudándose mutuamente e desfrutando dunha experiencia diferente e moi motivadora.

Como peche da actividade, cantamos unha cantiga dos Maios inventada polo alumnado dos cursos maiores de Primaria, que prepararon e ensaiaron coa profesora de Música. Foi un momento moi especial no que todas e todos puidemos gozar da música, da tradición e do gran traballo realizado polo alumnado.

O resultado foi espectacular: uns maios cheos de cor, imaxinación e ilusión que encheron o centro de alegría e espírito festivo.

Queremos agradecer especialmente a colaboración das familias, que participaron achegando materiais naturais para a elaboración dos maios. Grazas á vosa implicación e colaboración, esta actividade puido desenvolverse dun xeito tan especial e significativo para toda a comunidade educativa.

Tamén agradecemos a implicación de Xoana e Aroa, do profesorado e do alumnado, que fixeron posible unha experiencia tan enriquecedora. Sen dúbida, foi unha oportunidade perfecta para aprender xuntas e xuntos, convivir e seguir mantendo vivas as nosas tradicións.

Vivan os Maios!

SEMANA DO LIBRO

 Co gallo da Semana do Libro, no noso centro levamos a cabo unha fermosa actividade de apadriñamento lector, na que o alumnado maior comparte momentos de lectura cos máis pequenos.

Ao longo da xornada, os nenos e nenas de cursos superiores convertéronse en padriños e madriñas lectoras, escollendo contos axeitados e preparándose para lelos con agarimo e responsabilidade. Pola súa parte, o alumnado máis novo escoitou con atención e ilusión, gozando das historias e da compañía dos seus compañeiros e compañeiras maiores.

Esta actividade non só fomenta o gusto pola lectura, senón tamén valores como a cooperación, a empatía e a convivencia entre diferentes idades. Ademais, contribúe a crear vínculos moi especiais dentro da comunidade educativa e a converter a lectura nun momento compartido e significativo.

Sen dúbida, foi unha experiencia moi gratificante para todos e todas, que encheu a biblioteca de historias, sorrisos e complicidades.

PISCINA AWASAN

 

Nas derradeiras semanas, todo o alumnado do centro participou en dúas saídas á piscina Awasan, unha experiencia moi enriquecedora.

En ambas xornadas, os nenos e nenas tiveron a oportunidade de gozar das instalacións acuáticas, adaptando as actividades ás diferentes idades e niveis. Os máis pequenos iniciáronse no medio acuático a través de xogos, mentres que os maiores puxeron en práctica as súas habilidades de natación, combinando exercicio físico e diversión.

Ademais de aprender e facer exercicio, estas saídas serviron para fomentar hábitos de vida saudables, a autonomía persoal e o respecto polas normas dentro dun espazo compartido. O ambiente foi moi positivo en todo momento, destacando a boa convivencia entre todo o alumnado.

Sen dúbida, foron dúas xornadas moi divertidas e proveitosas, nas que o alumnado desfrutou moito e reforzou a súa relación cos compañeiros e compañeiras fóra da aula.

ESCOLA DE VELA CATAVENTOS

 O pasado xoves, o alumnado de 4º, 5º e 6º de Educación Primaria realizou unha saída á "Escola de Vela Cataventos", situada en Corcubión, co obxectivo de participar en actividades náuticas como a vela e o kaiak.

A xornada comezou cedo, cunha viaxe en autobús chea de ilusión e ganas de vivir unha experiencia diferente. Ao chegar, o persoal de Cataventos deulles a benvida e explicoulles as normas básicas de seguridade, así como o funcionamento do material que ían empregar.

Divididos en grupos, os nenos e nenas tiveron a oportunidade de iniciarse na práctica da vela, aprendendo a manexar as embarcacións e a orientarse co vento.

Ademais do aspecto deportivo, a saída tamén serviu para fomentar valores como o respecto polo medio natural, a convivencia e a cooperación entre compañeiros. O bo tempo acompañou durante toda a xornada, o que fixo a experiencia aínda máis agradable.

Ao rematar o día, o alumnado regresou ao centro escolar canso pero moi contento, levando consigo lembranzas inesquecibles e moitas ganas de repetir a experiencia.

AUDITORIO

 

Animalia é unha viaxe fantástica onde a música se atopa co mundo animal! O alumnado de Infantil, 1º e 2º de Primaria participou nesta saída tan especial en Santiago, onde tivemos a oportunidade de asistir a este espectáculo e descubrir que historias nos contan os compositores e tamén os seus gatos… Coas súas 7 vidas e moitas trasnadas, estes felinos especiais teñen historias sorprendentes para compartir!

Ademais, aproveitamos a visita para pasear polo lago que está ao carón do auditorio, onde puidemos ver os patos, e tamén merendamos ao aire libre, gozando dunha xornada moi completa.

Entre saltos e miados, exploramos como as notas da orquestra se mesturan coas aventuras felinas e descubrimos como cada melodía agocha segredos. Foi unha experiencia que nos achegou ao mundo da orquestra e á creatividade dos grandes compositores, espertando a imaxinación e o gusto pola música dun xeito divertido e accesible para os máis pequenos.

XORNADA DE EDUCACIÓN VIAL

Na xornada de hoxe a nosa biblioteca converteuse nun espazo de aprendizaxe moi especial. Recibimos a visita da Dirección Xeral de Tráfico (DXT) para desenvolver unha completa xornada de educación vial dirixida a todo o alumnado de Educación Infantil e Primaria.

Ao longo da mañá, nenos e nenas participaron en diferentes actividades adaptadas ás súas idades. O alumnado de Infantil aprendeu a importancia de cruzar polos pasos de peóns, respectar os semáforos e camiñar sempre da man dunha persoa adulta. As risas mesturáronse coas aprendizaxes nun ambiente dinámico e moi participativo.

Pola súa banda, o alumnado de Primaria profundou nas normas básicas de circulación, no uso responsable da bicicleta e dos patinetes, e na importancia de levar sempre casco e elementos reflectores. Tamén reflexionaron sobre o papel fundamental que todas as persoas temos como peóns, ciclistas ou viaxeiros.

A biblioteca, como espazo de encontro e formación, reafirma así o seu compromiso coa educación en valores e coa promoción de hábitos seguros e responsables. Aprender a coidarnos e a respectar as normas tamén forma parte do noso crecemento como cidadanía.

Queremos agradecer á Dirección Xeral de Tráfico a súa colaboración e a súa implicación nesta actividade tan necesaria. Sen dúbida, foi unha experiencia enriquecedora que deixou pegada no noso alumnado.

Seguimos aprendendo, tamén sobre rodas! 

DÍA DE ROSALÍA

 

Hoxe na noso centro celebramos con moita ilusión o Día de Rosalía, unha xornada moi especial adicada á nosa grande escritora Rosalía de Castro, símbolo da literatura e da identidade galega.

Para conmemorar esta data tan significativa, todo o alumnado participou con entusiasmo nunha serie de actividades cheas de creatividade e emoción. Cada neno e nena elaborou a súa propia careta coa cara de Rosalía, enchendo os corredores de sorrisos e miradas que nos transportaban ao século XIX.

Tamén tivemos un momento moi especial: escoitamos poemas recitados e cantados polo alumnado de Educación Primaria. As súas voces, cargadas de sentimento, fixeron que as palabras de Rosalía cobrasen nova vida, emocionando a todos os presentes.

Ademais, na biblioteca, todo o alumnado preparou a súa propia camiseta conmemorativa. Na parte dianteira planchamos a imaxe de Rosalía, e na parte traseira estampamos un fermoso fragmento dun dos seus versos:
"i eres a estrela que brila i eres o vento que zoa".

Foi unha xornada de convivencia, aprendizaxe e posta en valor da nosa cultura. Celebrar a Rosalía é lembrar a importancia da nosa lingua e da nosa literatura, e tamén sentir orgullo de quen somos.

Agradecemos a participación e implicación de todo o alumnado e profesorado, que fixeron posible unha celebración tan especial e chea de significado

ENTROIDO

 

A pasada semana o noso centro encheuse de cor, música e moita diversión coa celebración do Entroido! 🎭🎉

Durante toda a semana seguimos con entusiasmo as consignas do Meco, que cada día nos sorprendía cun novo obxecto que tiñamos que traer. Foi moi divertido ver como pouco a pouco iamos completando os nosos complementos e preparando o ambiente para a gran festa final.

O venres celebramos unha xornada moi especial xunto ás familias, que nos acompañaron nun día cheo de alegría e convivencia. Desfilamos con orgullo, bailamos sen parar e lucimos os nosos disfraces, todos eles relacionados co noso proxecto da alimentación.

O alumnado de Infantil disfrazados de polbo; 1º e 2º converteron o centro nunha auténtica festa de pementos de Padrón; 3º e 4º sorprenderon coas súas creativas sardiñas; e 5º e 6º pecharon o desfile cheos de enerxía cos seus disfraces de polos.

Foi unha celebración chea de ilusión, creatividade e traballo en equipo, na que se notou a implicación de toda a comunidade educativa. Grazas ás familias pola súa participación e por compartir connosco un día tan especial.

 

IOGA

 

Estamos moi ledos de anunciar o comezo dun novo ciclo de sesións de ioga dirixido a todo o alumnado. Esta iniciativa nace co obxectivo de fomentar o benestar emocional, a concentración e o equilibrio corporal, aspectos fundamentais no día a día escolar.

Unha vez ao mes, cada ciclo educativo gozará da súa propia sesión, adaptada ás idades e necesidades do alumnado. A través do movemento consciente, a respiración e pequenos momentos de relaxación, iremos descubrindo ferramentas que nos axuden a xestionar as emocións, mellorar a atención e fortalecer a autoestima.

As sesións estarán guiadas por Ana Prema, quen nos acompañará nesta fermosa viaxe cara ao autocoñecemento e o benestar. Coa súa experiencia e sensibilidade, converterá cada encontro nun espazo seguro, tranquilo e enriquecedor.

Estamos convencidos de que esta proposta será unha experiencia moi positiva para todo o centro, creando momentos de calma compartida e aprendizaxe máis alá da aula.

Comezamos esta nova etapa con ilusión… Namasté! 

Día Escolar da Non Violencia e da Paz

O venres pasado celebramos a paz dun xeito moi especial, implicando a todo o alumnado nunha actividade chea de significado e emoción. Sementamos a árbore “Somos froitos de paz”, unha fermosa creación colectiva na que cada neno e nena achegou palabras de agarimo, respecto e convivencia, convertendo a árbore nun símbolo vivo dos valores que queremos cultivar día a día.

A celebración continuou cun momento moi especial: todo o cole cantou e bailou xunto o Baile da Paz de Mamá Cabra, enchendo os espazos de música, alegría e mensaxes positivas. Foi unha experiencia compartida que reforzou o sentimento de comunidade e unión.

Ademais, os corredores do centro encheron de vida cos sorrisos do noso alumnado, expostos como mostra da ilusión e da felicidade, e cos símbolos da paz elaborados polos nenos e nenas, que nos lembran a importancia de convivir con respecto e empatía.

Seguimos apostando por actividades que educan no corazón, porque cremos firmemente que o noso alumnado é, hoxe e sempre, verdadeiro froito de paz. 🌿✌️